ಪಾತಳಿ

ಶಂಬಾ ಜೋಶಿಯವರು ತಮ್ಮ ಸಾಂಸ್ಕೃತಿಕ ವೈಚಾರಿಕ ಚಿಂತನೆಗಳಿಂದ ಭಾರತೀಯ ಸಾಂಸ್ಕೃತಿಕ ಇತಿಹಾಸದ ಮೇಲೆ ಹೊಸ ಬೆಳಕನ್ನು ಚೆಲ್ಲಿದವರು. ಅವರ ಅಧ್ಯಯನದ ನೆಲೆಗಳಲ್ಲಿ ಕನ್ನಾಡ ಸಂಸ್ಕೃತಿ, ಭಾರತೀಯ ಸಂಸ್ಕೃತಿ ಮತ್ತು ಮಾನವ ಸಂಸ್ಕೃತಿಯ ಅನುಕ್ರಮ ಬೆಳವಣಿಗೆಯಿದೆ. ಈ ಬೆಳವಣಿಗೆಯು ಅವರ ಅಧ್ಯಯನ ಮಾರ್ಗಕ್ಕೆ ಹೊಸ ಚೆಲುವನ್ನು ಪ್ರದಾನ ಮಾಡಿತು. ಅವರು ಸಂಕೇತಶಾಸ್ತ್ರ, ಇತಿಹಾಸಶಾಸ್ತ್ರ, ಭಾಷಾಶಾಸ್ತ್ರ, ಮನಃಶಾಸ್ತ್ರ ಮುಂತಾದುವುಗಳ ಬೆಳಕಿನಲ್ಲಿ ಕಂಡುಕೊಂಡ ಸಾಂಸ್ಕೃತಿಕ ಸತ್ಯಗಳು ಹಲವಾರು. ಇಂದು ಅವುಗಳ ಯುಕ್ತ ಅಧ್ಯಯನ ಆಗಬೇಕಾಗಿದೆ. ಅವರು ಮಂಡಿಸಿದ ವಿಚಾರಗಳ ಬೆಳಕಿಗೆ ನುಗ್ಗಿ ಆ 'ಸತ್ಯ'ಗಳನ್ನು ಕಂಡುಕೊಳ್ಳಬೇಕಾಗಿದೆ. ಇದು ಇನ್ನೂ ಮುಂದೆ ಸಾಗಬೇಕಾದ ದಾರಿ.

ಕಳೆದ ಅರವತ್ತು ವರ್ಷಗಳಲ್ಲಿ ಅವರ ಕೃತಿಗಳ ಬಗೆಗೆ, ಚಿಂತನೆಯ ಬಗೆಗೆ, ವೈಚಾರಿಕ ಆಕೃತಿಗಳ ಬಗೆಗೆ ಅಷ್ಟಿಷ್ಟು ಅಧ್ಯಯನಗಳು ನಡೆದಿವೆ. ಈ ಅಧ್ಯಯನ ಮತ್ತು ಪ್ರತಿಕ್ರಿಯೆಗಳು ಒಂದೇ ಬಗೆಯವಲ್ಲ; ಆದರೆ ನಡೆದಿರುವಷ್ಟು ಚಿಂತನೆ ಮತ್ತು ಅಧ್ಯಯನಗಳು ಉಪಯುಕ್ತವಾಗಿವೆ. ಈ ಅಧ್ಯಯನಗಳ ನೆಲೆಯು, ಆಲೂರು ವೆಂಕಟರಾಯರಿಂದ ಹಿಡಿದು ಈಚಿನ ಅನೇಕ ಯುವ ಲೇಖಕರವರೆಗೂ ವ್ಯಾಪಕವಾಗಿ ಹರಡಿದೆ. ಶಂಬಾ ಜೋಶಿಯವರ ಬಗೆಗೆ ವಿದ್ವತ್ ವಲಯವು ಪ್ರತಿಕ್ರಿಯಿಸಿದ ನೆಲೆಗಳನ್ನು ತಿಳಿಯಬಯಸುವವರಿಗೆ ಈ ಸಂಪುಟವು ಉಪಯುಕ್ತ ಆಕರವಾಗಬೇಕೆಂಬುದು ನಮ್ಮ ಆಸೆ. ಬರುವ 1996 ಶಂಬಾ ಅವರ ಶತಮಾನೋತ್ಸವದ ವರ್ಷ. ಆ ಉತ್ಸವಕ್ಕೆ 'ಬೆಳಕಿಂಡಿ'ಯಾಗಿ ಸಿದ್ಧಪಡಿಸಿದ ಅಧ್ಯಯನ ಸಂಪುಟವಿದು.

ಶಂಬಾ ವಿಚಾರ ವೇದಿಕೆ, ಬೆಂಗಳೂರು