ಬಣ್ಣದ ಲೋಕ

ಕಥೆ, ಕವಿತೆಗಳ ರೀತಿಯಲ್ಲೇ ಸಿನಿಮಾ ಬಗ್ಗೆ ಬರೆಯುವುದು ನನ್ನ ನೆಚ್ಚಿನ ಹವ್ಯಾಸಗಳಲ್ಲಿ ಒಂದು. ಬರವಣಿಗೆ ಶುರು ಮಾಡಿದ್ದು ಕವಿತೆ ಮೂಲಕವಾದರೂ, ಈ ವಿಷಯದ ಮೇಲೆ ಬರೆಯಲೇಬೇಕು ಅಂತ ಅನಿಸಿದ್ದು ಬಣ್ಣದ ಜಗತ್ತಿನ ಕುರಿತಾಗಿ. ಅದರಲ್ಲೂ ಪತ್ರಕರ್ತನಾಗಿ ಸಿನಿಮಾ ರಂಗಕ್ಕೆ ಪ್ರವೇಶ ಮಾಡಿದಾಗಿಂದ ಈ ತುಡಿತ ಮತ್ತಷ್ಟು ಹೆಚ್ಚಾಯಿತು. ಕಾರಣ, ಈ ಕ್ಷೇತ್ರದ ಕುರಿತು ಪುಸ್ತಕಗಳು ಕಡಿಮೆ. ಈ ಮಾತನ್ನು ಕೇವಲ ನಾನಷ್ಟೇ ಹೇಳುತ್ತಿಲ್ಲ, ವಿಶ್ವವಿದ್ಯಾಲಯಗಳಲ್ಲಿ ಸಂಶೋಧನೆ ಮಾಡುತ್ತಿರುವ ಅದೆಷ್ಟೋ ವಿದ್ಯಾರ್ಥಿ ಸ್ನೇಹಿತರು ನನ್ನೊಂದಿಗೆ ಹಂಚಿಕೊಂಡಿದ್ದಾರೆ. ಸ್ವತಃ ನಾನೂ ಕೂಡ ಈ ಕೊರತೆಯನ್ನು ಕಣ್ಣಾರೆ ಕಂಡಿದ್ದೇನೆ. ಹಾಗಾಗಿ ಹೆಚ್ಚೆಚ್ಚು ಈ ಕ್ಷೇತ್ರದ ಕುರಿತಾಗಿಯೇ ಇತ್ತೀಚೆಗೆ ಪುಸ್ತಕಗಳನ್ನು ಬರೆಯುತ್ತಿರುವೆ. ಸಿನಿಮಾ ರಂಗದ ಕುರಿತಾಗಿಯೇ ಬರುತ್ತಿರುವ ಏಳನೇ ಪುಸ್ತಕವಿದು. ಅದಕ್ಕೆ ಓದುಗರಾದ ನೀವು ಕೊಟ್ಟಿರುವ ಪ್ರೋತ್ಸಾಹವನ್ನು ನಾನೆಂದೂ ಮರೆಯಲಾರೆ.

-ಡಾ. ಶರಣು ಹುಲ್ಲೂರು