ಹಳೆಯ ಕವಿತೆ ಹತ್ತೊಂಬತ್ತು

'ಹಳೆಯ ಕವಿತೆ ಹತ್ತೊಂಬತ್ತ'ರ ರಚನೆಗಳಲ್ಲಿ ಪ್ರದರ್ಶನ ಗುಣವಿದೆ. ಪ್ರೇಕ್ಷಕರು ಮತ್ತು ಪಠ್ಯ ಪರಂಪರೆಯ ಓದುಗರು ಅರ್ಥನಿರ್ಮಾಣ ಕ್ರಿಯೆಯಲ್ಲಿ ಭಾಗವಹಿಸುವುದನ್ನೂ ಈ ರಚನೆಗಳು ಒಳಗೊಳ್ಳುತ್ತವೆ. ಕವಿತೆಯ ಕಥನಪೂರ್ಣತೆಗೆ ಓದುಗರೂ ಬೇಕು. ಕಥನ ಅನ್ನುವುದು ಮುಖ್ಯ. ಈ ಸಂಕಲನದ ಕವಿತೆಗಳ ಬಗ್ಗೆ ಮಾತಾಡುವ ಆಧುನಿಕ ವಿಮರ್ಶಕರು 'ಚೀನೀ ಭಾಷೆಯಲ್ಲಿ ಭಾವಗೀತೆ ಆರಂಭಗೊಂಡ ಕಾಲದ ರಚನೆಗಳು ಇವು. ಇಲ್ಲಿನ ಒಂದೊಂದು ಕವಿತೆಯೂ ಒಂದೊಂದು ನಾಟಕೀಯ ಸಂದರ್ಭವನ್ನು ಮಂಡಿಸುತ್ತದೆ. ಕವಿತೆಯೊಳಗೆ ಪೂರ್ಣವಾದ ಕಥೆಯೊಂದು ಅಡಗಿದೆ. ಅದನ್ನು ಕಲ್ಪಿತ ಕಥನ ಎಂದು ಕರೆಯಬಹುದು. ಹಾಡುಗಾರ/ಹಾಡುಗಾರ್ತಿ/ಕೇಳುಗರು/ಓದುಗರು ಈ ಕಲ್ಪಿತ ಕಥನವನ್ನು ಪ್ರವೇಶಿಸಿ ಅದರ ಪ್ರಮುಖ ಪಾತ್ರವಾದಾಗ ಮಾತ್ರ ಕವಿತೆ ಪೂರ್ಣವಾಗುತ್ತದೆ,' ಎನ್ನುತ್ತಾರೆ.