ಭಾಷೆ ಮತ್ತು ಸಂಸ್ಕೃತಿ

ಕನ್ನಡವೆಂಬುದು ಕೇವಲ ಒಂದು ಬಗೆಯ ಶಬ್ದಜನಕ ನುಡಿಗಟ್ಟುಗಳ ಸಮೂಹವಲ್ಲ. ಇದು ಇಲ್ಲಿಯ ಜನಪದರ ಭಾವನೆಗಳ ಸಂವಹನದ ಮಾಧ್ಯಮ, ಆಚಾರ-ವಿಚಾರಗಳ ಅಮೂರ್ತ ಸಾಂಕೇತಿಕ ಪ್ರತಿಮೆಯಾಗಿದೆ. ಸಂಸ್ಕೃತಿಯ ಅವಿಭಾಜ್ಯ ಅಂಗ, ಸಮಾಜದ ಜೀವ-ಜೀವಾಳವೇ ಆಗಿದೆ. ಕನ್ನಡ ನಾಡು ಕಂಡ ಅಪ್ರತಿಮ ಸತ್ಯಾನ್ವೇಷಿ ಡಾ|| ಶಂ.ಬಾ.ಜೋಶಿಯವರ ಪ್ರತಿಪಾದನೆಯ ಹೊಳವಿನಲ್ಲಿ ನೋಡಿದಾಗ ಈ ಭಾಷೆ ಮತ್ತು ಸಂಸ್ಕೃತಿ, ಒಂದು ಮತ್ತೊಂದರ ಪ್ರತಿಬಿಂಬದಂತಿವೆ.

ಎರವಲು ಪಡೆದ ಸಾಮಾಜಿಕ, ಸಾಂಸ್ಕೃತಿಕ ಮೌಲ್ಯಗಳನ್ನು ಎಗ್ಗಿಲ್ಲದೇ ಅಪ್ಪಿಕೊಳ್ಳುತ್ತಿರುವ ಈ ಹೊತ್ತಿನಲ್ಲಿ ನಮ್ಮ ನಡೆ-ನುಡಿಯಲ್ಲಿನ ವೈರುಧ್ಯದಿಂದಾಗಿ ಎಲ್ಲಿ ಕಳೆದು ಹೋಗುತ್ತಿದ್ದೇವೆಯೋ ಎಂಬ ಅಧೀರತೆ ಕಾಡುತ್ತಿದೆ. ನಿನ್ನೆಯ ಗೊಂದಲಗಳಿಂದ ಇಂದು ಹೊರಬರಬೇಕಾಗಿದೆ. ಅದಕ್ಕಾಗಿ ನಮ್ಮ ಭಾಷೆ-ಸಂಸ್ಕೃತಿಯ ಅವಿನಾಭಾವ ಸಂಬಂಧ, ಆದರ್ಶಗಳಲ್ಲಾದ ಸ್ಥಿತ್ಯಂತರದ ಪರಿಣಾಮ, ನಮ್ಮತನದ ಪ್ರತೀಕವಾಗಿರುವ ಭಾಷೆಯ ಉಳಿವು, ಬೆಳವಣಿಗೆಗೆ ನಾವು ಮಾಡಬೇಕಾಗಿರುವ ಕರ್ತವ್ಯಗಳ ಮೇಲೆ ಈ ಕೃತಿ ಬೆಳಕು ಚೆಲ್ಲುತ್ತದೆ.