ಆಕಾಶದಲ್ಲಿ ಏನಿದೆ? ಏಕಿದೆ?

ತಾರಾಲಯಕ್ಕೆ ಬರುವ ದೂರವಾಣಿ ಕರೆಗಳ ಕೆಲವು ಉದಾಹರಣೆಗಳು. 'ಪೂರ್ವದಲ್ಲಿ ಧೂಮಕೇತು ಕಾಣುತ್ತದೆ ಎಂದು ಪತ್ರಿಕೆಯಲ್ಲಿದೆ. ಬೆಂಗಳೂರಲ್ಲಿ ಪೂರ್ವ ಯಾವುದು ?”, “ಆಕಾಶದಲ್ಲಿ ಬೆಳ್ಳಗೆ ಈಗ (ಸಂಜೆ ನಾಲ್ಕು ಗಂಟೆಗೆ) ಕಾಣ್ತಾ ಇದೆ; ಅದೇನಾ ಧೂಮಕೇತು ? “ಧೂಮಕೇತು ನೋಡಲು ಬೆಂಗಳೂರು ಈಸ್ಟ್ ರೈಲ್ವೇ ಸ್ಟೇಷನ್‌ಗೆ ಹೋಗಬೇಕೆ ?”, “ಐದೂವರೆ ಅಂದ್ರೆ ಬೆಳಿಗ್ಗೇನೋ ಸಾಯಂಕಾಲಾನೋ... ಅಷ್ಟು ಬೇಗ ಏಳೋಕ್ಕಾಗೋಲ್ಲ... ಎಂಟು ಗಂಟೆಗೆ ಕಾಣೋಲ್ಲವೇ ?... ಯಾಕೆ?”, “ನಿಮ್ಮತ್ರ  ಟೆಲಿಸ್ಕೋಪು ಇದೆಯಲ್ಲಾ; ಈಗ (ಮಧ್ಯಾಹ್ನ ಒಂದು ಗಂಟೆ) ನೋಡಬಹುದಾ ?”, “ಗ್ರಹಣ ನೋಡಿದ್ರೆ ಸ್ನಾನ ಮಾಡ್ಬೇಕು ಅಂತಾರೆ; ಧೂಮಕೇತು ನೋಡಿದ್ರೂ ಸ್ನಾನ ಮಾಡೇಕಾ ?”, ಬೆಂಗಳೂರಿನ ಹೊರಗಿನಿಂದ ಬರುವ ಕರೆಗಳು ಬೇರೆ ರೀತಿಯವು. “ಗ್ರಹಣ ಕೊಹಿಮಾಗೆ ಕಾಣುತ್ತದೆಯಂತೆ; ನಮಗೇಕಿಲ್ಲ ?" “ಚಂದ್ರನ ಪಕ್ಕ ಒಂದು ಪ್ರಕಾಶಮಾನವಾದ ಚುಕ್ಕೆ ಮೊನ್ನೆ ಇತ್ತು ; ಈಗ ಏಕಿಲ್ಲ?” “ನಮ್ಮ ದೂರದರ್ಶಕದಲ್ಲಿ ಧೂಮಕೇತುವಿನ ಬಾಲ ಏಕೆ ಕಾಣೋಲ್ಲ ?", “ಒಂದು ನಕ್ಷತ್ರ ವಿಮಾನದಷ್ಟು ಬೇಗ ಓಡಿ ಹೋಗ್ತಾ ಇತ್ತು; ಅದು ಹೇಗೆ ಸಾಧ್ಯ ?” – ಈ ಪ್ರಶ್ನೆಗಳಿಗೆಲ್ಲಾ ಮೂಲ ಕಾರಣ - ಒಂದೇ. ಎಂದೂ ತಲೆ ಎತ್ತಿ ಆಕಾಶವನ್ನೇ ನೋಡದಿರುವುದು! ಕಳೆದುಹೋಗಿರುವ ಆಕಾಶಜ್ಞಾನವನ್ನು ಪುನರಾವರ್ತನೆ ಮಾಡುವುದೇ ಈ ಪುಸ್ತಕದ ಉದ್ದೇಶ.