ಕನ್ನಡ-ಕನ್ನಡ-ಇಂಗ್ಲಿಷ್ ಸಂಕ್ಷಿಪ್ತ ನಿಘಂಟು

ಕನ್ನಡ ಸಾರಸ್ವತ ಲೋಕಕ್ಕೆ ವಿವರಣಾತ್ಮಕವಾಗಿರುವ, ಮೂರು ಸಂಪುಟಗಳ ಒಂದು ಬೃಹತ್ ಕನ್ನಡ-ಇಂಗ್ಲಿಷ್ ನಿಘಂಟನ್ನು ನೀಡಿರುವ ಶ್ರೀ ವಿ. ಕೃಷ್ಣ ಅವರು ವಿದ್ಯಾರ್ಥಿಗಳು, ಅನುವಾದಕರು, ಸಾಮಾನ್ಯ ಭಾಷಾಭ್ಯಾಸಿಗಳು ಹಾಗೂ ಕನ್ನಡ ಮತ್ತು ಇಂಗ್ಲಿಷನ್ನು ಕಲಿಯಬಯಸುವ ಅನ್ಯಭಾಷಿಕರಿಗಾಗಿ ಈ ಕನ್ನಡ-ಕನ್ನಡ-ಇಂಗ್ಲಿಷ್ ಸಂಕ್ಷಿಪ್ತ ನಿಘಂಟನ್ನು ರಚಿಸಿದ್ದಾರೆ. ಇದು ವಿವರಣಾತ್ಮಕವಾಗಿರುವುದರಿಂದ ಕನ್ನಡ ಪದಗಳ ಅರ್ಥ ಹಾಗೂ ಅದರ ಛಾಯೆಗಳನ್ನು ನಿಖರವಾಗಿ ತಿಳಿಯಲು ಸಹಾಯಕವಾಗಿದೆ. ವಿವರಣೆಗೆ ಸಾಧ್ಯವಾದಷ್ಟೂ ಸರಳ ಇಂಗ್ಲಿಷ್ ಪದಗಳನ್ನು ಬಳಸಲಾಗಿದೆ.

ಈ ನಿಘಂಟಿಗಾಗಿ ಪದಗಳನ್ನು ಆಯ್ಕೆಮಾಡುವಾಗ ಪ್ರಸ್ತುತ ಬಳಸುತ್ತಿರುವ ಹಾಗೂ ನಡುಗನ್ನಡದ ಪದಗಳನ್ನು ವಿಶೇಷವಾಗಿ ಗಮನದಲ್ಲಿಟ್ಟುಕೊಳ್ಳಲಾಗಿದೆ. ಇದು 18,300 ಮುಖ್ಯೋಲ್ಲೇಖಗಳನ್ನೂ, ಅವುಗಳಿಗೆ 30,000ಕ್ಕೂ ಹೆಚ್ಚು ಅರ್ಥವಿವರಣೆಗಳನ್ನೂ ಒಳಕೊಂಡಿದ್ದು, ಈಗ ಮಾರುಕಟ್ಟೆಯಲ್ಲಿ ದೊರೆಯುವ ಕನ್ನಡ-ಇಂಗ್ಲಿಷ್ ನಿಘಂಟುಗಳಿಗಿಂತ ದೊಡ್ಡದೂ, ವಿಶಾಲಾರ್ಥಗಳನ್ನು ನೀಡುವಂತಹುದೂ ಆಗಿದೆ.

ಸಮಾನಾರ್ಥವನ್ನು ನೀಡುವ ಮುಖ್ಯೋಲ್ಲೇಖಗಳು ಪರಸ್ಪರ ಹತ್ತಿರದಲ್ಲಿದ್ದಾಗ ಮಾತ್ರ ಅವುಗಳಲ್ಲಿ ಒಂದಕ್ಕೆ ಅರ್ಥಗಳನ್ನು ನೀಡಿ, ಉಳಿದವುಗಳಿಗೆ ಅರ್ಥವನ್ನು ನೀಡಿರುವ ಮುಖ್ಯೋಲ್ಲೇಖವನ್ನು ನೋಡಿ ಎಂಬ ಸೂಚನೆಯನ್ನು ಕೊಡಲಾಗಿದೆ. ಎರಡು ಪುಟಗಳಿಗೂ ಹೆಚ್ಚು ದೂರದಲ್ಲಿದ್ದರೆ ಅರ್ಥಗಳನ್ನು ಆ ಎಲ್ಲಾ ಪದಗಳಿಗೂ ಅವುಗಳ ಮುಂದೆಯೇ ನೀಡಲಾಗಿದೆ. ಈ ಮೂಲಕ ನಿಘಂಟಿನ ಪುಟಗಳನ್ನು ತಿರುಗಿಸಿ ಹುಡುಕುವ ಶ್ರಮವನ್ನು ತಪ್ಪಿಸಿ ಇದನ್ನು ಬಳಕೆದಾರರ ಸ್ನೇಹಿಯನ್ನಾಗಿಸಲಾಗಿದೆ.