ಬಿಫೋರ್ ಯು ಫಾಲ್

ಬರವಣಿಗೆ ಎಂಬುದು ಒಂದು ಕಲೆ (an art), ಇದು ಎಲ್ಲರಿಗೂ ಸಿದ್ಧಿಸದು. ಅಂತಹದ್ದರಲ್ಲಿ ಈ ಕಲೆಯನ್ನು ಕರಗತ ಮಾಡಿಕೊಂಡ ಗ್ರಾಮೀಣ ಪ್ರತಿಭೆ ಅಭಿಲಾಷ್ 'ಜೀವ ಮತ್ತು ಜೀವನಕ್ಕೆ' ಒಂದು ಪುಟ್ಟ ಮಾರ್ಗದರ್ಶಿ ಸೂತ್ರದ ಕೃತಿಯನ್ನು ರಚಿಸಿದ್ದು ಪ್ರಶಂಸನೀಯ, ಪುಟ್ಟ ಪುಟ್ಟ ಅನುಭವ ಮತ್ತು ಕಥೆಗಳ ರೂಪದ ಈ ಕೃತಿ 'ಚಿಕ್ಕದು ಸುಂದರವಾದುದು' (small is beautiful) ಎಂಬ ರೂಪದಲ್ಲಿದೆ. ಪ್ರತಿಯೊಂದು ಮನಸು ಮತ್ತು ವಯಸ್ಸಿಗೆ ಸರಿಹೊಂದುವ ರೀತಿಯಲ್ಲಿ ತಿಳಿಯಾದ ಭಾಷೆ ಮತ್ತು ಆಕರ್ಶಕ ನಿರೂಪಣಾ ಶೈಲಿಯಲ್ಲಿ ರೂಪುಗೊಂಡಿರುವುದು ಈ ಪುಟ್ಟ ಕೃತಿಯ ಹೆಗ್ಗಳಿಕೆ. 'ಜಾಗತೀಕರಣ' ಎಂಬ ಬಿರುಗಾಳಿಯ ಈ ಪೈಪೋಟಿಯುಕ್ತ ಯುಗದಲ್ಲಿ ಹಣಕಾಸಿನ ನಿರ್ವಹಣೆ ಸವಾಲಿನಂತಹುದು. ಪ್ರತೀ ವ್ಯಕ್ತಿಯ ಅಳಿವು ಅಥವಾ ಉಳಿವು ಅವರವರ ನಿರ್ಧಾರಗಳನ್ನು ಅವಲಂಬಿಸಿರುತ್ತವೆ. 'ಯೋಚಿಸಿ ಮುಂದಡಿಯಿಡು ಮತ್ತು ಸರಿಯಾಗಿ ಯೋಜಿಸು' ಎಂಬುದು ಈ ಕೃತಿಯ ತಿರುಳು, ಈ ಕೃತಿಯು ಎಲ್ಲಾ ವಯಸ್ಸಿನವರಿಗೂ ಉಪಯುಕ್ತ. ಅದರಲ್ಲೂ ಭವಿಷ್ಯವನ್ನು ಅರಸಿ ಅಂಬೆಗಾಲನ್ನಿಡುತ್ತಾ, ಕೆಲವೊಮ್ಮೆ ಓಡುತ್ತಾ, ಕೆಲವೊಮ್ಮೆ ಮುಗ್ಗರಿಸುತ್ತಾ ಹಾಗೂ ಮಗದೊಮ್ಮೆ ಯಶಸ್ಸಿನ ಉತ್ತುಂಗಕ್ಕೆ ಏರುತ್ತಾ ಸಾಗುತ್ತಿರುವ ಇಂದಿನ ಯುವ ಕಣ್ಮಣಿಗಳಿಗೆ ತಮ್ಮ ಭವಿಷ್ಯದ ದಿನಗಳನ್ನು ಸರಿಯಾಗಿ ಯೋಜಿಸಲು ಈ ಕೃತಿ ಅತ್ಯುಪಯುಕ್ತ, ಇಂತಹಾ ಅದ್ವಿತೀಯ ಮತ್ತು ಮಹತ್ವಾಕಾಂಕ್ಷಿ ಕೃತಿಯನ್ನು ಎಳೆವಯಸ್ಸಿನಲ್ಲೇ ರಚಿಸಿದ 'ಅಭಿ' ನಿಜಕ್ಕೂ ಅಭಿನಂದನಾರ್ಹ.

ಡಾ. ಎಚ್.ಆರ್ ಕೃಷ್ಣಮೂರ್ತಿ (ಎಚ್ಚಾರ್ಕೆ)

ವಿಶ್ರಾಂತ ಪಾಂಶುಪಾಲರು

ಖ್ಯಾತ ಅರ್ಥಶಾಸ್ತ್ರ ಬರಹಗಾರರು

ನ್ಯಾಷನಲ್ ಕಾಲೇಜು, ಬಸವನಗುಡಿ