ಭಾರತಕ್ಕೆ ಸ್ವಾತಂತ್ರ ಒದಗಿಬಂದು ಒಕ್ಕೂಟದ ಸ್ಥಾಪನೆಯಾದಮೇಲೆ, ಹಲವಾರು ಭಾಗಗಳಾಗಿ ಒಡೆದು ಹೋಗಿದ್ದ ಕನ್ನಡನಾಡು ನಾಡಿನ ಹಿರಿಯರ ನಿಸ್ವಾರ್ಥ ಪರಿಶ್ರಮದ ಫಲವಾಗಿ ಒಗ್ಗೂಡಿ ಒಂದಾಯಿತು. ಆದರೆ ಅವತ್ತಿನಿಂದ ಇವತ್ತಿನವರೆಗೂ ಕನ್ನಡ ನಾಡನ್ನು ಕಾಡುತ್ತಿರುವ ಮೂರು ಮುಖ್ಯ ವಿಷಯಗಳೆಂದರೆ
- ನಾಡಿನ ಹಿತವನ್ನು ಕಾಯುವಂತಹ ಪ್ರಾದೇಶಿಕ ಪಕ್ಷದ ಕೊರತೆಯ ನಡುವೆ, ನಾಡನ್ನು ಅತಂತ್ರ ಸ್ಥಿತಿಯಲ್ಲಿ ಕೈಬಿಡುವ ರಾಷ್ಟ್ರೀಯ ಪಕ್ಷಗಳೇ ಆಡಳಿತದಲ್ಲಿರುವುದು.
- ಕನ್ನಡ ನಾಡಿನಲ್ಲಿ ಕನ್ನಡದ ಸಾರ್ವಭೌಮತೆಯನ್ನು ಹಿಂದೀ ಭಾಷೆಯ ಮೂಲಕ ತೊಡೆದುಹಾಕಲು ನಡೆದಿರುವ "ಹಿಂದೀ ಹೇರಿಕೆಯ ಪ್ರಯತ್ನಗಳು"
- ಕನ್ನಡ ನಾಡನ್ನು ರಾಜಕೀಯವಾಗಿ ತುಂಡು ತುಂಡು ಮಾಡಬೇಕೆನ್ನುವ ಕೂಗುಗಳು.
ಈ ಮೂರೂ ವಿಷಯಗಳ ಸುತ್ತ ಆಳವಾದ ಚಿಂತನೆಯುಳ್ಳ ಹೊತ್ತಗೆಗಳನ್ನು ಬನವಾಸಿ ಬಳಗ ಪ್ರಕಾಶನವು ಹೊರತಂದಿದೆ. ಕನ್ನಡನಾಡಿನ ರಾಜಕೀಯ ಸ್ಥಿತಿ-ಗತಿಗಳ ಬಗ್ಗೆ ಗಮನ ಇಟ್ಟಿರುವವರು, ರಾಜಕೀಯ ಭವಿಷ್ಯದ ಬಗ್ಗೆ ಕಾಳಜಿ ಉಳ್ಳವರು ಓದಲೇಬೇಕಾದ ಹೊತ್ತಗೆಗಳಿವು.